Consello Galego de Museos

Museo de Historia Natural

O Museo de Historia Natural da Universidade de Santiago de Compostela é un centro con fortes potencialidades educativas e sociais que desenvolve tarefas de investigación, docencia e divulgación científica.  O seu patrimonio está constituído por coleccións que foron conformándose desde o século XIX con doazóns de numerosos científicos, naturalistas, institucións e particulares. Algunhas destas coleccións teñen recoñecido prestixio, tanto científico como cultural.

As novas instalacións de que dispón e a súa total renovación convérteno nun museo moderno, que mostra as ciencias naturais dunha forma comprensible e rigorosa, nun contexto como o actual de crecente interese social polo medio natural. As salas expositivas están constituídas por grandes instalacións nas que se representan temas de actualidade como biodiversidade e xeodiversidade; ecosistemas (augas continentais, bosque mixto caducifolio, o litoral, sabana africana e selva sudamericana); así como os grandes biomas terrestres e a súa fauna máis representativa. Tamén hai salas de menor formato dedicadas a minerais, rochas, fósiles, meteoritos, o solo, invertebrados mariños, tartarugas, algas mariñas e peixes.